სამხრეთ კავკასიის ბიომრავალფეროვნების რუკა

National Geographic Magazine – საქართველოსა და საქართველოს ეროვნული მუზეუმის მჭიდრო თანამშრომლობის შედეგად, კომპანია „სილქნეტის“ მხარდაჭერით შეიქმნა სამხრეთ კავკასიის ბიომრავალფეროვნების რუკა და მისი მუდმივად განვითარებადი ინტერაქტიული ვებგვერდი. პირველ ეტაპზე რუკის ელექტორნულ ვერსიაზე დატანილი იქნა სამხრეთ კავკასიის ბიომრავალფეროვნების ძირითადად საქართველოში გავრცელებულ სახეობათა 120 ილუსტრაცია და ის ძირითადი სამეცნიერო ინფორმაცია, რომელიც დაინტერესებულ მომხმარებელს პირველად ინფორმაციას მიაწვდის კონკრეტული სახეობის შესახებ, ხოლო ბეჭდურ ვერსიაზე ჯერ-ჯერობით დატანილია 98 სახეობა, მათი ლათინური, ქართული და ინგლისური დასახელება და ბუნების დაცვის მსოფლიო ფონდის (IUCN) მიერ მინიჭებული კონსერვაციული სტატუსი.

რუკის მასშტაბური, ბეჭდური ვერსიის ხილვა (ზომით 3მx1.5მ), ს. ჯანაშიას სახელობის საქართველოს მუზეუმის კავკასიის ბიომრავალფეროვნების გამოფენაზეა შესაძლებელი.

პროექტის სამეცნიერო ნაწილზე საქართველოს ეროვნული მუზეუმის მეცნიერებთან ერთად იმუშავეს ილიას სახელმწიფო უნივერსიტეტის მეცნიერებმაც. მათი და National Geographic Magazine-ის გუნდის ხელმძღვენლობით ილუსტრატორებმა შექმნეს უმაღლესი ხარისხის ილუსტრაციები.

სამომავლოდ იგეგმება როგორც სახეობების დამატება, ასევე არეალის გაზრდა და მეზობელი ქვეყნების ტერიტორიაზე მეტი ადგილის მონიშვნა.

სამხრეთ კავკასიის ბიომრავალფეროვნების პირველი ილუსტრირებული რუკის შექმნა შესაძლებელი გახდა GIZ-ის პროექტის „ბიომრავალფეროვნების ინტეგრირებული მართვა სამხრეთ კავკასიაში” მხარდაჭერით.

ლეოპარდი

სახეობა: Panthera pardus 

ქართული სინონიმები: ჯიქი

გავრცელება: XX საუკუნის დასაწყისისთვის ჯიქის გავრცელების არეალი მოიცავდა საქართველოს თითქმის მთელ ტერიტორიას ჯავახეთისა და სამხრეთ-აღმოსავლეთ საქართველოს გამოკლებით; დღეისთვის შემორჩენილია მხოლოდ ვაშლოვანის ნაკრძალში, სავარაუდოდ, ბინადრობს  კავკასიონის ქედის აღმოსავლეთ ნაწილში – პირიქითა ხევსურეთში, თუშეთში და სპეროზას მთაზე, კავკასიონის ქედის აღმოსავლეთ ნაწილში – საქართველოს, აზერბაიჯანისა და სამხრეთ რუსეთის საზღვარზე, ყარაბაღისა და ზანგეზურის ქედებზე, აღმოსავლეთ სომხეთსა და დასავლეთ აზერბაიჯანში, თალიშის მთებში

ჰაბიტატი: ბინადრობდა კოლხეთის ჭარბტენიან ლანდშაფტებში, ჭალის ტყეებში, ზოგადად ტყის, სუბალპურ და ალპურ სარტყლებში. ამჟამად ბინადრობს მხოლოდ ძნელად მისაღწევ კლდოვან ადგილებში

კონსერვაციის სტატუსი (საერთაშორისო):
VU (მოწყვლადი)

კონსერვაციის სტატუსი (ეროვნული):
CR (კრიტიკულ საფრთხეში მყოფი)

რიცხოვნობა: იშვიათი

* ბუნების დაცვის მსოფლიო კავშირის (IUCN) მიერ განსაზღვრული საფრთხის დონეები: საჭიროებს ზრუნვას (LC); საფრთხესთან ახლოს მყოფი (NT); მოწყვლადი (VU); საფრთხეში მყოფი (EN); კრიტიკულ საფრთხეში მყოფი (CR); ეროვნულ დონეზე გადაშენებული (RE); ბუნებაში გადაშენებული (EW); გადაშენებული (EX); არ არის შეფასებული (NE); არასრული მონაცემები (DD)
detail right image