სამხრეთ კავკასიის ბიომრავალფეროვნების რუკა

National Geographic Magazine – საქართველოსა და საქართველოს ეროვნული მუზეუმის მჭიდრო თანამშრომლობის შედეგად, კომპანია „სილქნეტის“ მხარდაჭერით შეიქმნა სამხრეთ კავკასიის ბიომრავალფეროვნების რუკა და მისი მუდმივად განვითარებადი ინტერაქტიული ვებგვერდი. პირველ ეტაპზე რუკის ელექტორნულ ვერსიაზე დატანილი იქნა სამხრეთ კავკასიის ბიომრავალფეროვნების ძირითადად საქართველოში გავრცელებულ სახეობათა 120 ილუსტრაცია და ის ძირითადი სამეცნიერო ინფორმაცია, რომელიც დაინტერესებულ მომხმარებელს პირველად ინფორმაციას მიაწვდის კონკრეტული სახეობის შესახებ, ხოლო ბეჭდურ ვერსიაზე ჯერ-ჯერობით დატანილია 98 სახეობა, მათი ლათინური, ქართული და ინგლისური დასახელება და ბუნების დაცვის მსოფლიო ფონდის (IUCN) მიერ მინიჭებული კონსერვაციული სტატუსი.

რუკის მასშტაბური, ბეჭდური ვერსიის ხილვა (ზომით 3მx1.5მ), ს. ჯანაშიას სახელობის საქართველოს მუზეუმის კავკასიის ბიომრავალფეროვნების გამოფენაზეა შესაძლებელი.

პროექტის სამეცნიერო ნაწილზე საქართველოს ეროვნული მუზეუმის მეცნიერებთან ერთად იმუშავეს ილიას სახელმწიფო უნივერსიტეტის მეცნიერებმაც. მათი და National Geographic Magazine-ის გუნდის ხელმძღვენლობით ილუსტრატორებმა შექმნეს უმაღლესი ხარისხის ილუსტრაციები.

სამომავლოდ იგეგმება როგორც სახეობების დამატება, ასევე არეალის გაზრდა და მეზობელი ქვეყნების ტერიტორიაზე მეტი ადგილის მონიშვნა.

სამხრეთ კავკასიის ბიომრავალფეროვნების პირველი ილუსტრირებული რუკის შექმნა შესაძლებელი გახდა GIZ-ის პროექტის „ბიომრავალფეროვნების ინტეგრირებული მართვა სამხრეთ კავკასიაში” მხარდაჭერით.

მეგრული არყი

სახეობა: Betula megrelica

გავრცელებასაქართველო – სამეგრელო: ჩიტა-წყალი, ცაშკიბუ (ცოგუკიბალ), ჯვარის მთა, მიგარია,  ასხი, ჩოკაში.

ჰაბიტატი: დაბალი, ნახევრად გართხმული ხე იზრდება ჭარბტენიან, ტანბრეცილ ტყეებში, კირქვიან კლდეებზე სუბალპურ სარტყელში, ძირითადად 1500-2000 მ სიმაღლეზე ზღვის დონიდან, ზოგან ჩამოდის უფრო დაბლა 1250-1400 მ-მდე.

კონსერვაციის სტატუსი (საერთაშორისო):
EN (საფრთხეში მყოფი)

კონსერვაციის სტატუსი (ეროვნული):
VU (მოწყვლადი)

შენიშვნა: დასავლეთ საქართველოს ვიწროლოკალური ენდემური სახეობა, საყურადღებოა კავკასიის ფლორის ისტორიის შესწავლისთვის, ტყის ზედა საზღვარზე ქმნის სუბალპურ ტანბრეცილ ტყეს, წმინდა კორომებს (არყნარებს) ან შერეულია სხვა მერქნიან მცენარეებთან. სუბალპურ არყნარს უდიდესი ნიადაგდაცვითი და წყალმარეგულირებელი მნიშვნელობა აქვს.

არყის ფოთლები და კვირტები შეიცავს ეთერზეთებს, საპონინებს, C ვიტამინს. მათ იყენებენ ბურახისა და სიროფის დასამზადებლად ტრადიციულ მედიცინაში ანთების საწინააღმდეგო, ნაღველმდენ, ტკივილგამაყუჩებელ და ა.შ. საშუალებად.

რიცხოვნობა: ინფორმაცია საქართველოში ამ ტაქსონის რაოდენობის შესახებ არ არსებობს.

* ბუნების დაცვის მსოფლიო კავშირის (IUCN) მიერ განსაზღვრული საფრთხის დონეები: საჭიროებს ზრუნვას (LC); საფრთხესთან ახლოს მყოფი (NT); მოწყვლადი (VU); საფრთხეში მყოფი (EN); კრიტიკულ საფრთხეში მყოფი (CR); ეროვნულ დონეზე გადაშენებული (RE); ბუნებაში გადაშენებული (EW); გადაშენებული (EX); არ არის შეფასებული (NE); არასრული მონაცემები (DD)
detail right image